Igros Kodesh (the Rebbe)
Letter 9604
מתפללי בית הכנסת "עטרת צבי", אַטלאַנטיק סיטי
עס האָט מיר געפרייט צו באַקומען, זיינערצייט, די ידיעה וועגן דער אַלגעמיינער פאַרזאַמלונג פון די חברים און מתפללים שליט"א און די החלטה ווייטער אויפצוהאַלטן – און זיכער אויך פאַרשטאַרקן – די שול; און וועגן דער דערוויילונג פון אַ נייער הנהלה אונטער דער אָנפירערשאַפט פון הוו"ח אי"א נו"נ עוסק בצרכי ציבור מו"ה לוי יצחק שי' אייזנער צוזאַמען מיט די אַנדערע מיטגלידער פון דער עקזעקוטיווע.
זיכער איז איבעריק צו אונטערשטרייכן, אַז דאָס איז די ריכטיגע החלטה און גוטע החלטה. וואָרום עס איז דאָך שטענדיג די פליכט צו שטאַרקן און אויסברייטערן אַ כשר'ע שול, בפרט אין אונזער צייט.
עס איז דעריבער צו האָפן, אַז די הנהלה און די מתפללים שי' וועלן זיך ניט באַגנוגנען מיט אויפהאַלטן די שול, נאָר וועלן אָנווענדן אַלע באַמיאונגען אויסצוברייטערן די שול, סיי בכמות – פאַרגרעסערן די צאָל מיטגלידער און מתפללים, און סיי באיכות – דורך פּאַסנדע שיעורי-לימוד ברבים וכו'. און דער זכות הרבים וועט זיכער ביישטיין.
השם יתברך זאָל העלפן אַז די שול זאָל זיך אַנטוויקלען און אויפבליען בגשמיות וברוחניות גם יחד, און עס זאָל באַרעכטיגן דעם נאָמען "קהילה קדישא", און זאָל זיין אַ צנור ממשיך צו זיין ברכת ה' צו יעדן איינעם פון די בויער, שטיצער און מתפללים, מיט זייערע בני בית שיחיו.
Imported from igros-index · Kehot Publication Society · commercial · the copy kept on ChassidusHub
Suggest a fixSent for review
Report a problemNo account needed
Embed on another site
About this page
Details
- Volume
- Volume 26
- Id
- rh-2gqrhwnk
Copies
Recent activity
No fix suggested or problem reported here yet.
Sources
- sichos-kodesh-unit